Leto to Platina, Preface to Varro's De lingua Latina

to cite this entry

The text is based on the 1471 imprint. Abbreviations are expanded. Punctuation and capitals are standardized according to current practice.

Pomponius Platinae salutem.

M. [P. M. 1474] Terentius Varro, togatorum litteratissimus, inter innumerabilia uolumina ingenii sui — uir Romanus et qui solus Asinii Pollionis iudicio uiuens statuam in bibliotheca Palatina meruit — xii libros De lingua Latina scripsit. In primis tribus de ethimologia, in secundis tribus unde uocabula sint imposita in lingua Latina, et de poetarum consuetudine, a septimo ad decimum de analogia, in postremis tribus de copia uerborum. Quorum omnium aetate nostra sex corrupti in manibus habentur. Eos monitu Lelii Vallensis, magne et singularis doctrine, legi summa cura ac diligentia. Vbi librarii litteras mutauerunt correxi. In his, que inscitia penitus corrupit, non ausus sum manum imponere, ne forte magis deprauarem. Addidi tamen indicem per ordinem litterarum, ut qui non nimis curiosi sint facilius inueniant. Tu qui castigatissime omnia inspicis, si laborem hunc laudaueris, habebunt mihi gratias qui legerint, sin [si 1474] minus, calamo non parcas, quoniam ego — et scio non fallor — in hac fece hominum tanti te facio, quanti M. Tulli<um> [Tul. ed. 1474], cui dedicauit hos libros seculo eruditissimo, fecit Varro. Vale.

Colophon:

Finis eius quod inuenitur Marci Varronis. Parce, qui legeris, si aliqua minus polita inueneris. Nam ita ex omni parte, siue seculum fecerit siue librarii, uolumen quoduis [quod uis 1474] corruptum erat, ut necesse fuerit aucupari hinc inde sententias. Ideo sine rubore [robore 1474] ueniam dabis et errori manum inponas, Pomponius tuus orat. Vale.

J. Ramminger (2005)
Last changed: 6 June 2018.

TO TOP